თუ გნებავთ 15-20% ეკონომია გაწიოთ და თანაც შეგიძლიათ, ბინას 1-2 წელიწადი ელოდოთ, მაშინ ჯობია ,,ახალშენი" იყიდოთ. საქართველოში ძირითადად ე.წ მონოლითი სახლები შენდება ე.წ პანელურ სახლს იშვიათად თუ ნახავთ. მართალია ასეთი სახლები უფრო სწრაფად შენდება და შედარებით იაფიც ღირს, მაგრამ მონოლითური სახლების უპირატესობა უკეთეს თბოიზოლაციასა და ნაკლებ ხმაურგამტარობაშია. ეს უკანასკნელები უფრო მდგარადები არიან (8 ბალამდე მიწისძვრას უძლებენ) და მათი ექსპლუატაციის ხანგრძლივობაც 200 წლამდე აღწევს (კეთილსინდისიერი მშენებლობის შემთხვევაში), როცა საპანელო სახლის საექსპლუატაციო ვადა 75 წლამდეაა. ასე რომ, გადაწყვეტილების მიღებისას ბევრი რამ უნდა გაითვალისწინოთ. ძალიან დიდი მნიშვნეკლობა აქვს იმ კომპანიის არჩევას, რომელმაც სახლი უნდა ჩაგაბაროთ. რისკფაქტორების შესამცირებლად სასურველია შეისწავლოთ ფირმის მიერ შემოთავაზებული მომსახურების ნუსხა, მისი დოსიე: შესრულებული პროექტები, ბაზარზე მუშაობის გამოცდილება და სტაჟი. თუ კომპანია თვითონ არის მშენობლობით დაკავებული, მაშინ უფრო მეტი ბერკეტი აქვს სახლის დროულად დამთავრებისთვის. მყიდველსაც მეტი გარანტიის მიღება შეუძლია,რომ ბინას შეუფერხებლად მიიღებს. თუ ფირმა ახალბედაა, მაშინ შეეგუეთ იმ აზრს, რომ მშენებლობის ვადები გაიწელება ან უფრო უარესი, საერთოდ არ დასრულდება. ასეთი პრობლემები აქვთ ზოგიერთ პატარა კომპანიებსაც.

მეორადი ბინების ბაზარს თავისი დადებითი მახასიათებელი გააჩნია. არ არის საჭირო ცდა თუ როდის მორჩებიან საქმიანობას მშენებლები, შემდეგ, როდის გამართავენ კომუნიკაციებს და ა.შ აქ შესახლება ყიდვისთანავე შეიძლება რაიონის არჩევაც ბევრად უფრო ადვილია. წარმოიდგინეთ, ფანჯრიდან გადაშლილ ხედასაც კი შეიგულებთ. არანაკლებ მნიშვნელოვანია ის ფაქტორიც, რომ სარემონტო სამუშაოები მეორად ბინებში ბევრად ნაკლებ თანხებს მოითხოვს, ვიდრე ,,ახალშენში". მეორადი ბინის საყიდლად შეგიძლიათ სხვადასხვა მეთოდები გამოიყენოთ: მშრალ ხიდზე ისევ ბევრი მაკლერი დგას, გაზეთებიდან კი ათასობით განცხადება ქვეყნდება, მაგრამ უკვე ყველაზე დიდი შესაძლებლობა გაჩნდა ინტერნეტში.  ყველაფერი ეს იმდენად რთული და მომქანცველია ჩვეულებრივი არაპროფესიონალისატვის, ამიტომ ყველას გირჩევთ ისარგებლოთ უძრავი ქონების სააგენტოების მომსახურებით.